काठमाडौं, २८ फागुन – साताको अन्तिम कारोबार दिन बिहीबार सेयर बजार २३.८७ अंकले वृद्धि भएको छ। सो वृद्धिसँगै नेप्से परिसूचक २८२० अंकमा कायम भएको छ। कारोबार रकम पनि बढेको छ; अघिल्लो दिन १३ अर्ब १८ करोड भएकोमा आज १४ अर्ब ५५ करोडको कारोबार भएको छ।
आज १७६ कम्पनीको मूल्य बढ्दा ७७ को घट्यो र ९ कम्पनीको मूल्य स्थिर रह्यो। समूहगत रूपमा, बैंकिङ समूह सबैभन्दा धेरै बढेको छ, २.०२% वृद्धि। अन्य समूहहरूमा विकास बैंक १.२८%, फाइनान्स १.३०%, हाइड्रोपावर १.१०%, लगानी १.१४%, जीवन बीमा ०.३६%, उत्पादन तथा प्रशोधन ०.७३%, माइक्रोफाइनान्स ०.२७%, र व्यापार ०.१४% ले मूल्य बढाएको छ।
तर, निर्जीवन बीमा ०.०४%, अन्य ०.७४%, र होटल तथा पर्यटन समूह ०.३५% ले मूल्य घटेको छ। चार कम्पनीको मूल्य १०% ले वृद्धि भएको छ, जसमा साल्पा विकास बैंक, रिलायन्स स्पिनिङ मिल्स, नेसनल हाइड्रोपावर, र होटल फरेस्ट इन रहेका छन्। होटल फरेस्ट इन आजै कारोबारमा आएको हो।
त्यस्तै, दरामखोला हाइड्रोपावर ९.४६%, र हिमाल दोलखा हाइड्रोपावर ७.१४% ले मूल्य वृद्धि गरेको छ। सबैभन्दा बढी मूल्य घट्ने कम्पनी त्रिशुली जलविद्युत् ३.१४% ले घटेको छ। आज धेरै कारोबार भएका कम्पनीहरूमा नेसनल हाइड्रोपावर, एचआईडीसीएल प्रोमोटर, कुमारी बैंक, हिमाल दोलखा हाइड्रोपावर, र बलेफी हाइड्रोपावर रहेका छन्।
